Eanet aht' eanet geavaheaddjit gávppašit bensiinna daid beivviid goas leat hálbbes hattit, čájeha guorahallan maid Gilvobearráigeahčču lea čađahan. Hattit molsašuddet olu báikkis báikái. Dál áigu bearráigeahčču láhčit dili vai šaddá stuorit gilvu bensiidna geavaheddjiid alde.
– Guorahallan nanne min áddejumi ahte báikkálaš gilvvus lea stuora mearkkašupmi bensiidna hattiide, muitala ráđđeaddi Jan Petter Fedje Gilvobearráigeahčus.
Gilvu lea garraseamos ja hattit hálbbimusat guovlluin gos leat olu geavaheaddjit. Dáppe čuvvot bensiidnahattit hui čielga vahkkosaš minstara, divraseamos hattit vuossárgga maŋŋil gaskabeaivvi ja vahkku mielde fas hálbot. Bearráigeahču guorahallan čájeha ahte geavaheaddjit dáid guovlluin dađistaga heivehit gávppašanvieruid daid beivviid ektui goas hattit leat hálbbimusat.
– Eanaš bensiidna gávppašeapmi dáhpáhuvvá sotnabeivviid ja vuossárggaid, ovdal go hattit divrot. Dán lágan gávppašanvieruid eat oainne guovlluin gos ii leat seammá lágan vahkkominsttar, muitala Fedje. Son čujuha ahte hattit eai rievdda nu olu ovtta vahkus dakkár guovlluin gos leat dušše moadde bensiidna stašuvnna, ja hattit leat doppe divraseabbo.
Hálida eanet bensiidna stašuvnnaid
– Eanet bensiidnavuovdit leat dehálaččat gilvvu dáfus, ja Gilvobearráigeahčču hálida álkidahttet vejolašvuođaid ođđa fitnodagaide searvat boaldámušmárkanii. Dát mielddisbuvttášii eanet gilvvu ja hálbbit hattiid, cealká Fedje.
Áigu geahčadit bensiidnavuorkkáid mat gávdnojit
Ođđa fitnodagat leat sorjavaččat das ahte sii fidnejit oastit boaldámuša. Gilvobearráigeahčču áigu danne guorahallat vejolašvuođaid ođđa fitnodagain leat šiehtadallat oljofitnodagaid bensiidna vurkkodedjiiguin mat juo leat gávpemárkanis.
Vuđolaš čohkkejuvvon dieđut norgga boaldámuš gávpeovttastusain leat vuođđun Gilvobearráigeahču guorahallamii, gos bensiidnahattit leat árvvoštallojuvvon áigodagas 2004–2008.