Konkurransetilsynet kan kome til å gripe inn mot Plantasjen sitt kjøp av Oddernes Gartneri, fordi oppkjøpet svekkjer konkurransen i Kristiansand-området.
– Konkurransetilsynet er oppteke av konkurransen i lokale marknader. Plantasjen er ein stor aktør innan hagesenter, og vi ønskjer å sikre konkurransen ved at store, nasjonale aktørar ikkje får monopol i lokale marknader, seier konkurransedirektør Christine Meyer.
Tilsynet har varsla partane om at det vurderer å forby at Plantasjen overtek Oddernes Hagesenter, som ligg i nærleiken av Plantasjen sitt eige utsal på Tobienborg i Kristiansand.
– Våre undersøkingar tyder på at oppkjøpet vil føre til ei vesentleg avgrensing av konkurransen i hagesentermarknaden, seier avdelingsdirektør Magnus Gabrielsen.
Får ein sterk posisjon
– Plantasjen kjøper opp den nærmaste konkurrenten i dette området. Vi vurderer det slik at konkurransen frå andre hagesenter og gartneri ikkje er tilstrekkeleg, blant anna fordi dei er små og ligg spreidd til. Heller ikkje andre aktørar, som Ikea – som også har eit visst utval av planter – vil vere gode nok alternativ. Etter oppkjøpet vil Plantasjen få ein så sterk marknadsposisjon i dette området at forbrukarane vil kome dårlegare ut når det gjeld prisar, utval, kvalitet og service, seier Gabrielsen.
Konklusjonane er blant anna baserte på undersøkingar Konkurransetilsynet har gjort hos konkurrentar og andre aktørar i marknaden. Konkurransetilsynet har også gjennomført ei spørjeundersøking blant kundar av hagesentra.
Ikkje lønnsamt for forbrukarane
Plantasjen meiner at oppkjøpet vil utløyse effektivitetsgevinstar som er større enn ulempene for konkurransen.
– Det kan godt vere at oppkjøpet vil vere lønnsamt for Plantasjen, men det er ikkje dokumentert at effektivitetsgevinstane er samfunnsøkonomiske innsparingar som tilsynet skal leggje vekt på, seier Gabrielsen.
– Vi har derfor varsla partane om at vi vurderer å forby oppkjøpet, seier han.
Konkurransetilsynet understrekar at dagens varsel om eit mogeleg inngrep ikkje er eit endeleg vedtak. Etter konkurranselova har selskapa no 15 yrkedagar på å kommentere dei førebelse vurderingane til tilsynet. Tilsynet har deretter 15 yrkedagar til å gjere endeleg vedtak i saka.
